wisdomtamil

தேவையானவைகளை  மிகுந்த சிரமப்பட்டு தேடி தான்  அடையவேண்டியிருக்கிறது.

ஆனால் இலகுவாக கிடைக்கின்ற விடயங்களால்  தான் வாழ்க்கை  மேலும் மோசமடைகிறது.

இப்பூமிப்பந்தில்  

அசையாதது ஏதும் உண்டா?

இயங்காதது ஏதும் உண்டா?

நிரந்தரமானது என்று ஏதும் உண்டா?

இங்கு மாறாதது ஏதும் உண்டா?

 ஒவ்வொரு பொருளுக்குள்ளும் இந்தப் பிரபஞ்ச இயக்கம் இருக்கிறது.  அதுவே பொருளாகவும்,இயக்கமாகவும் இயக்கப்படுபவனாகவும். அதுவே காட்சியாகவும் காண்பனவாகவும்  இருக்கிறது. மாறுபனவாகவும் மாறாதனவாகவும் அதுவே இருக்கிறது.

 ஒரு சுவர் அசையாது போல கண்களுக்கு தெரியும் . ஆனால் அப்படி எமக்கு தெரிவது ஒரு மாயையான பிம்பமே… மணிக்கு 1600 km வேகத்தில் சுற்றிச் சுழலும் ஒரு காந்தப் பந்தில் அசைவின்றி ஒரு பொருள் இருப்பது எப்படி சாத்தியம்?

ஒரு‌புகையிரதத்தினுள் இருக்கும் எல்லா பொருட்களும் அசையாமல் இருப்பது போன்றே இருக்கும். ஆனால் அந்த புகையிரதம் ?

 திடப்பொருடகள் திரவப் பொருள் சூட்சமம் ‌ என்று இங்கே எதுவும்   நிரந்தரம்  இல்லை. எதுவும் அழிவதுமமில்லை ஆவதும் இல்லை. பிறப்பதும் இல்லை இருப்பதும் இல்லை. நுட்பமாக  அணுகினால் அது ஒன்றிலிருந்து இன்னொன்றாக உருமாறிக் கொண்டே இருக்கிறது. இங்கு கண்ணுக்கு தெரியாத இந்த சங்கிலித்தொடர் போர்  பல கோடி வருடங்களாக நிகழ்ந்துகொண்டே  தான் இருக்கிறது.  

 ஜடப் பொருளாக இருக்கும் ‌ஒன்று தன்னை உடைத்து  சூட்சும நிலைக்கு உருமாறி சுதந்திரத்தை அனுபவித்து விடவும்   

சூட்சமமாக இருக்கும்  ஒன்று பிறப்பெடுத்து  அனுபவத்தை பெற்றுவிட… துடிக்கின்ற ஒரு‌ நிலையைத்  தான் போராட்டம்  என்கிறேன்..

இந்த உலகத்தில் எதுவுமே நிரந்தரமில்லாத போது, எதை இழந்து விடுவோம் என்று பயப்படுகிறீர்கள்?

“ப்ரக்ஞானம் பிரம்ம”  பொருள்: தூய்மையான விழிப்புணர்வே (Consciousness) பிரம்மம்.

 -   மதியோகி.

ஒரு புகையிரத நிலையத்தில் நாம்  காத்திருக்கும் போது…. அங்கு  வந்து நிற்கிறதே  என்பதற்காக  அங்கு வருகின்ற எல்லா பேரூந்துகளிலும்   ஏறி யாரும் பயணம் செய்வதில்லை.

ஏதோ ஒரு ஊருக்கு நாம் போகவேண்டியிருந்தால்  …அங்கு செல்வதற்கு அது  சரியான பேருந்து தானா என உறுதி செய்தபின்  அதில் ஏறிபயணம் செய்கின்றோம்.

ஆனால்…  இதற்கு மாறாக எமக்குள் உருவாகின்ற எல்லா எண்ணங்களையும் ஏன் நாம் வார்த்தைகளாக மாற்றிக்கொண்டிருக்கிறோம்?.  வருகின்ற எல்லா  எண்ணங்களில்  ஏன் ஏறி பயணம் செய்து கொண்டிருக்கின்றோம்?

அவைகளை கட்டளைகள் என்றெனண்ணி  ஏன் ஒவ்வொன்றாக  நிறைவேற்றிக்கொண்டிருக்கின்றோம்?

அதன் விளைவுகளால்  மீண்டும் மீண்டும்  ஏன் அவதிப்படுகிறோம்?

அவசியமான எண்ணங்களோடு மட்டும் பயணிக்கலாம்… புற எண்ணங்களை.அந்த  புகையிரத்தைப் போல.. ஒரு நிகழ்வாக  எண்ணி எம்மை கடந்து போக  அனுமதிக்கலாமே..!

எமது எண்ணங்களும்  எம்மை கடந்து செல்லும் அந்த புகையிரதத்தைப் போல எமக்கு முன்னால் நடக்கின்ற ஒரு நிகழ்வு.. தானே தவிர….

அது கட்டளையல்ல… 

“ப்ரக்ஞானம் பிரம்ம”  பொருள்: தூய்மையான விழிப்புணர்வே (Consciousness) பிரம்மம்.

 -   மதியோகி.

 உள்ளே வெறுமை இருந்தால்…

உலகம் வெறுப்பாக தான் தெரியும்.

அனைவரும் கயவர்களாக தெரிவார்கள்.

உள்ளே அமைதி இருந்தால் …

உலகம் மிக அழகாகத்  தெரியும்

அனைத்தும் அழகாக தெரியும்.அனைவருக்குள்ளும் அன்பு இருப்பது புரியும்.

வெளியே எப்போதும் எதையோ தேடிக்கொண்டிருப்பவர்களின் தேடல் ஒருபோதும் நிறைவடைவதில்லை....!!!

உள்முகமாக தன்னை  தேடி…  தன்னை உணர்ந்தவர்களே…முழுமையடைவார்கள்.

 பேரமைதியை உணர்வார்கள்.

இல்லையென்றால்

மரணம் வரை இந்த தேடல் நீழும். 

தேடும்விடயங்கள் மாறலாம். தேடல் மறாது.  

உலகில்  காணும் அத்தனை மனிதர்களும் ஏதோ ஒன்றை துரத்திக் கொண்டிருக்கிறார்கள்..

சிலர் உறவுகளை 

சிலர் பணத்தை

சிலர் அங்கீகாரத்தை

சிலர் மதிப்பை…

கணவன் நல்ல மனைவியைத் தேடுகிறான்…

மனைவி நல்ல  கணவனை ..

முதலாளி  நல்ல வேலைக்காரன் தேடுகிறான்.

இப்படியாக  எல்லோரும் எதையோ…

தேடிக்கொண்டிருக்கிறார்கள்..

யாராவது தன்னை தேடவேண்டும் என்றே .. எல்லோரும் விரும்புகிறார்கள்.

 தன்னை தான்  தேடுவதில்….யாருக்கும்… அக்கறையில்லை.